快樂港人增，比率看齊不快樂

【明報專訊】2022年快將告別，香港民意研究所噚日公布一項調查，發現36%港人對過去一年生活快樂，較上年嘅29%多咗7個百分點。不過，同樣有36%港人表示過去一年生活唔快樂，按年跌咗4個百分點。

對香港「樂觀淨值」2009年新高

民研今個月初隨機抽樣用電話訪問咗1004個香港居民，發現巿民對香港過去一年整體發展嘅「滿意淨值」（滿意率減不滿意率）係負20個百分點，情况同舊年相若。至於展望將來，對出年香港整體發展嘅「樂觀淨值」係正28個百分點，較舊年嘅12個百分點大幅增加，亦創2009年以嚟新高。

就快踏入2023年，講到新年願望，49%人嘅願望同社會相關，例如涉及經濟、民生、政治等方面，按年增加9個百分點；20%人嘅願望同個人層面相關，即係關乎健康、心境、事業、學業、財富、家庭、愛情、婚姻、朋友等多個範疇。

另外，有12%人願望同世界和平或友愛相關，較上年6%顯著上升，亦有9%人無新年願望，較舊年嘅18%顯著下跌。