「義」比「利」重要

【明報專訊】財經事務及庫務局長許正宇上周出席亞洲開發銀行年會，噚日發表〈訪菲律賓馬尼拉說好香港故事有感——有利、有理亦有情〉網誌，介紹此行成果，並引述《孟子．梁惠王上》提及孟子拜見梁惠王時，梁惠王問孟子：「叟不遠千里而來，亦將有以利吾國乎？」（意指問孟子千里迢迢而來，一定係有啲對其國家有利嘅高見吧）。許正宇就話：「先賢經驗告訴我們，拜訪他國前應先準備好能為他人帶來之利。」

Emily睇番原文，孟子隨後回應梁惠王「王何必曰利？亦有仁義而已矣」，指如果國家上下只顧利益，就會引來互相衝突，強調「義」應該比「利」重要。

許正宇喺網誌話，此行向各國代表介紹香港可提供嘅金融服務，亦拜訪咗菲律賓官員。許正宇又話，已漸漸探索出一套屬於自己嘅「心法」去向外國說好香港故事，分別須有「利、理、情」，包括要透過利益打開溝通合作之門，以數據說明本港優勢，以及深入了解對方文化同感受。許局長提到，佢10月下旬會去泰國出席亞太經合組織（APEC）會議。