津貼市民凍精卵

【明報專訊】新民黨立法會議員何敬康（Adrian）早前同黨友去澳門考察，除咗見佢阿叔，即全國政協副主任、澳門第一任特首何厚鏵外，仲去咗澳門科技大學（澳科大）參觀。佢噚日同Emily講，澳科大有好多學生想嚟香港發展或進修，Adrian希望日後喺呢方面可以做多啲連繫工作，另一方面協助有意喺大灣區，包括澳門發展嘅香港中小企，更有效透過現有政策進入大灣區市場。

講開新民黨多次建議政府透過資助鼓勵生育，包括向使用卵子及精子冷藏服務嘅市民提供5萬元津貼等，本身結咗婚幾年、未有仔女嘅Adrian話，好多夫婦擔心，如果決定唔生仔女，之後覺得後悔就太遲，而呢個都係佢同太太考慮多年嘅掙扎，所以佢認為，政府資助最主要唔係錢嘅問題，而係想幫到一啲夫婦，萬一日後後悔，都有多一個生育嘅機會。