盂蘭文化節增祈福許願 市民可組隊玩「搶孤」

【明報專訊】2017-08-18

「2017盂蘭文化節」嚟喇。潮屬社團總會9月1至3日會喺維園搞一系列盂蘭節活動，為慶祝香港回歸20年，大會新增兩項活動，其中「祈福香港」，大會會為港人祈個平安；另外市民今年可以喺現場拎張許願卡寫低願望，帶同許願卡，踏進「天地許願區」許願。大會並設盂蘭水墨工作坊，到時有導師教你畫水墨畫。

除咗一向搞開嘅素食美食攤位、文化導賞、水墨畫展等，第三屆盂蘭文化節重頭戲一如以往係「搶孤」競賽（指以大竹簍搶接從上方掉落嚟嘅米袋，寓意搶孤魂野鬼嘅祭品），市民可組隊參賽試吓搶孤滋味，大會仲安排冠軍隊同立法會議員隊「一決高下」。今年繼續辦親子盆供堆疊賽，無預先報名參賽嘅市民亦可即場試玩。

向中學生派通識教材

去年出版嘅《孟蘭的故事》漫畫書受歡迎，大會今年推出通識專題研習教材《香港盂蘭文化與當代社會》，將向中學生派發。參與盂蘭文化節導賞員計劃嘅樹仁大學林浩琛同學話，之前參與過《九龍城潮僑盂蘭會五十周年特刊》編撰工作，今次喺文化節做導賞員兼親善大使，「市民未必明白天圓地方意思，我哋會協助（解說）」。