李嘉誠勉學子勿做愚人

【明報專訊】2017-06-28

身兼汕頭大學校董會名譽主席嘅長和主席李嘉誠，噚日帶埋細仔、盈科拓展主席李澤楷去咗汕頭大學，參加汕大畢業禮。誠哥致辭時勉勵同學，並以愚人作比喻，話愚人「希望有個富爸加上天賦的優越組合」，以為咁就可以更舒服，佢話呢種心態反而係「輸在起跑線上」。

智者能把to do變to be

李嘉誠以「愚人見石、智者見泉」講故事，叫大家應該做智者。佢話「因循的併發症是不思不想和無感無知」，叫學生時時刻刻要靈敏、快知快明，要有獨立思考悟力。佢話愚人只知道「為」（to do），但智者就有願力，把「為」（to do）變「成為」（to be），所以叫大家修煉成為「願力一族」。佢話，「愚人常常抱怨，變得墨守成規是被逼出來的，被制度營役、被繁文縟節綑綁」，話佢哋渴望「贏在起跑線上」，「希望有個富爸加上天賦的優越組合……這樣的心態，他們已輸在起跑線上」，指呢種心態只會阻礙佢哋發展。誠哥認為，「懂得『善擇』，才是打造自己命運的保證」，勉勵所有畢業生要自律，唔能夠顧影自憐，仲要「不怕疲憊、不怕痛苦」先得。