新聞：古埃及《亡靈書》 《耶穌行醫》版畫

【明報專訊】2017-05-08

沙田文化博物館上月底開始展出超過130件法國羅浮宮館藏，每件都有獨特歷史同故事，政府新聞網噚日上載短片，由文化博物館館長鄭煥棠「導覽」，特別推介當中幾件展品，例如寫上詩篇同咒語、名為《亡靈書》嘅古埃及人陪葬品，同埋喺版畫藝術發展佔重要地位嘅《耶穌行醫》版畫初稿，令市民未入場已經可以大開眼界。

鄭煥棠話，古埃及人相信人死後靈魂依然存在，但要得到永生就要接受挑戰，《亡靈書》其中一段詩篇，就講述靈魂嘅心臟，要攞到冥王前接受審判，如果心臟比一根羽毛重，就代表佢係有罪嘅人，得唔到永生，因為羽毛代表正義。

至於荷蘭畫家林布蘭嘅作品《耶穌行醫》，鄭煥棠話呢幅版畫初稿喺羅浮宮收藏中屬於「第一版」，比較珍貴，林布蘭喺畫中有好多技術探索，例如線條輕重同灰度變化都相當豐富。

今次展覽設有教育專區，鄭煥棠話展覽雖然無將名畫《蒙羅麗莎》帶嚟香港，但博物館喺專區內改用電子圖像，剪輯咗一幅「蒙羅麗莎」，背景係香港風景，市民可以拍照留念。展覽展期至7月24日。