全國放魚日

噚日係「全國放魚日」，漁護署首次同深圳市規劃和自然資源局及深圳市海洋發展局合辦「增殖放流」活動，喺大鵬灣內鄰近深圳嘅香港水域（圖）同東平洲海岸公園放流兩萬多條幼魚。（漁護署提供）

【明報專訊】噚日係「全國放魚日」，漁護署首次同深圳市規劃和自然資源局及深圳市海洋發展局合辦「增殖放流」活動，喺東平洲海岸公園同大鵬灣內鄰近深圳嘅香港海域，投放約2.35萬條屬本地魚種嘅幼魚，當中包括極危嘅紅斑、較常見嘅石蚌、黃腳鱲等。漁護署話活動可以提升水生生物資源，提高公眾改善水生環境嘅意識。

「增殖放流」即係以科學方法，將合適嘅品種放番去自然環境生長。

漁護署話東平洲海岸公園有人工魚礁、珊瑚群等多樣化生境，適合幼魚棲息，日後將會定期調查水底，記錄幼魚放流後嘅情况，並監測本港漁業資源。副環境及生態局長黃淑嫻提醒，市民參與放生活動前要謹慎考慮，唔好破壞生態環境，甚至令動物承受不必要痛苦。

活動吸引約150名學生、漁民組織等代表參與，其中漁農界立法會議員何俊賢話，活動有效避免因胡亂放生造成嘅外來物種入侵、疾病傳播等，佢建議未來活動結合海島觀光、潛水運動等，發展香港嘅生態旅遊同體驗式旅遊，提升本港旅遊吸引力。

機管局都響應 放流極危白花魚

另外，機管局噚日都喺機場附近嘅人工魚礁舉辦增殖放流，一共放流6萬條幼魚，包括極危嘅白花魚、本地養殖嘅包公等。